8. నీరాగంలో...!

అలా తడుస్తున్నంత సేపూ
నాలో ఎక్కడనుండి ప్రవహిస్తుందో
తనువంతా కాంతులీనుతున్న ఓ విద్యుల్లత!

ఏకాకిని చేసి భయపెట్టే
నిరాశ నిశీధికి నిలయమైన నా కళ్ళు
తేజోవంతమై మెరిసిపోతున్నాయి
ఒక అణువునై పోయైనా
ఆ స్వరజల్లుల్లో లయాన్వితం కావాలనుకొనే
నా ఇన్నేళ్ళ తఫః ఫలానికో
సుమధుర సుందర సాక్షాత్కారం!
-డా.దార్ల వెంకటేశ్వర రావు
(`మూసీ' ద్వైవార్షిక ప్రత్యేక సంచిక, నవంబరు_డిసెంబరు 1999)